Dija alih dija ruruh
Legan nyete ne sujati
Ane kebawosang bagia
Dugi paling bakat alih
Bantangin ban mas lan selaka
Tan merawat nang akikit
Sayan sugih sayan inguh
Ngampilang brana sesai
Takut tanggehang pisaga
State selang dihati
Rasa ade ne ngitungang
Ngrebut arta aji nyilib
Pisaga tong bakat gugu
Krasa pade iri hati
Pade ngadu sebeng getar
Kenyongne anggona nyilib
Nyetnye kaliput lan jela
Mangatonang anak sugih
Mare tahu teken unduk
Witning nyliksik nyet pedidi
Woh bonggane mare ngendas
Anake bakat aranin
Krase brayane ngedegang
Jatinnya woh kardi niri
Awake bes sanget begug
Bongga teken dewek sugih
Tan rungu ring nyame braya
Nyapatin ajin ngelawanin
Reh ngrase sing kuwangan amah
Ape buin idihang kanti
Kencegan baan punyah pitu
Mrasa teken awak inggil
Twara ade saman pade
Mrasa dewek bagus ririh
Salwirya pinih utama
Sing ade ngasorang pasti
Engsap teken pade patuh
Pakenyet nyamane jati
Tusing ade nyak nyekjekang
Masih ja pade ngingenin
Sugihe pejang dijumah
Ngudiang anake endogin
Mare bakat baan ngeruruh
Sadia bagiane sujati
Trikaya parisudha
Nyet tabuh laksana suci
Ane ento tuah sarannya
Suluh sulur sujati
Kenehe apang da begug
Tabuhe de mangungkulin
Lanksanane mangde rapah
Kemban lan itatwam asi
Wit nyete saling ngerunguang
Pade pedak menatingin
(Mudastra, Sembiran 1998)
